2018-19 ఆర్థిక సర్వే

బడ్జెట్‌కు ముందు 2018-19 సంవత్సర ఆర్థిక సర్వేను జూన్ 4న కేంద్రఆర్థికమంత్రి నిర్మలా సీతారామన్ పార్లమెంట్‌లో ప్రవేశపెట్టారు.

ముఖ్య ఆర్థిక సలహాదారు కృష్ణమూర్తి సుబ్రమణియన్ రూపొందించిన ఈ నివేదిక దేశ ఆర్థిక పరిస్థితులను ప్రతిబింబించింది. దీంతోపాటు దేశ ఆర్థిక వ్యవస్థ ఎదుర్కొంటున్న సవాళ్లను ప్రస్తావించింది. 2019-20 ఆర్ధిక సంవత్సరానికి గానూ భారత జీడీపీ వృద్ధి రేటు 7 శాతంగా ఉంటుందని ఈ సర్వే అంచనా వేసింది. 2018-19 ఆర్ధిక సంవత్సరంలో సాధారణ ద్రవ్యలోటు 5.8 శాతంగా ఉందని, 2017-18 సంవత్సరంలో ఇది 6.4 శాతంగా ఉందని వెల్లడించింది.

2018-19 ఆర్థిక సర్వేలోని ముఖ్యాంశాలు.. 

• 2020 ఆర్థిక సంవత్సరంలో జీడీపీ వృద్ధిరేటు 7శాతంగా ఉంటుంది
• డిమాండ్, రుణ లభ్యత పెరగడంతో 2020లో పెట్టుబడుల వృద్ధి రేటు కూడా పెరిగే అవకాశం ఉంది.
• వ్యయాలు పెరగడం, ప్రైవేటు పెట్టుబడుల్లో వృద్ధి కారణంగా 2019-20లో జీడీపీ వేగంగా పెరుగుతుంది.
• ప్రపంచ ఆర్థిక వ్యవస్థల మందగమనం, వాణిజ్య ఘర్షణలు పెరగడం ఈ ఆర్థిక సంవత్సరంలో ఎగుమతులపై ప్రభావం చూపించే అవకాశం ఉంది.
• భారత్ 2025నాటికి 5 ట్రిలియన్ డాలర్ల ఆర్థిక వ్యవస్థగా మారాలంటే మాత్రం వృద్ధి రేటు ఇప్పటి నుంచే 8శాతం దాటాలి.
• చమురు ధరలు అందుబాటులో ఉండటం వల్ల వినిమయ శక్తి పెరగవచ్చు. 2019 ఏడాది చమురు ధరలు తగ్గవచ్చు.
• పెట్టుబడుల రేటు 2011-12 నుంచి క్రమంగా తగ్గుతూ వస్తోంది. 2019-20 నుంచి మళ్లీ పెట్టుబడుల రేటు పెరిగే అవకాశం ఉంది.
• గ్రామీణ ప్రాంతాల్లో వేతనాల్లో వృద్ధి కనిపించే అవకాశం ఉంది. 2018 వరకు వీటిలో వృద్ధి నిలిచిపోయింది. ఆ తర్వాత నుంచి పెరుగుదల కనిపిస్తోంది.
• వృద్ధిరేటులో మందగమనం, జీఎస్‌టీ, వ్యవసాయ పథకాల ఒత్తిడి ఆర్థిక వ్యవస్థపై ఉంటుంది.
• దేశంలో సుస్థిర ప్రభుత్వం ఏర్పడటం పెట్టుబడుల వాతావరణాన్ని పెంచుతుంది.
• ఎఫ్‌డీఐల నియంత్రణ తగ్గించేలా ప్రభుత్వ పాలసీలు ఉండే అవకాశం ఉంది.
• ఈ ఏడాది ద్రవ్యలోటు తగ్గి 5.8శాతం ఉండొచ్చు. అదే 2018లో 6.4శాతంగా ఉంది.
• మొండిబాకాయిలు తగ్గుముఖం పట్టడం.. మూలధన వ్యయాల పెంపునకు సహకరించవచ్చు.

2018-19 సంవత్సర ఆర్థిక సర్వే పూర్తి కాపీ కోసం క్లిక్ చేయండి.