రెండో స్థానంలో భారత్‌ : ప్రపంచ టీమ్‌ చెస్‌

ప్రపంచ టీమ్‌ చెస్‌ ఛాంపియన్‌షిప్‌లో భారత పురుషుల జట్టు మరో విజయాన్ని సాధించింది. గురువారం జరిగిన మూడో రౌండ్లో భారత్‌ 3.5-0.5తో ఈజిప్ట్‌ను ఓడించింది. తొలి గేమ్‌లో అధిబన్‌ గెలవగా... రెండో గేమ్‌ను శశికిరణ్‌ డ్రా చేసుకున్నాడు. ఆ తర్వాత సూర్యశేఖర గంగూలీ, అరవింద్‌ చిదంబరం తమ గేమ్‌లను గెలవడంతో భారత్‌ ఘన విజయం సాధించి 9 పాయింట్లతో పట్టికలో రెండో స్థానంలో నిలిచింది. మహిళల విభాగంలోనూ భారత జట్టు విజయాన్ని అందుకుంది. పద్మిని, భక్తి కులకర్ణి తమ గేమ్‌లను గెలవడంతో పాటు ఈషా కర్వాడె డ్రా చేసుకోవడంతో భారత్‌ 2.5-0.5 పాయింట్ల తేడాతో అర్మేనియాను ఓడించింది. మొత్తం 6.5 పాయింట్లతో నాలుగో స్థానంలో నిలిచింది.